O Guverno aprobisardja parastine o modo sar si te den pes le sastimaske servisurja astarindos katar o 1-to aprilo; ande divesa so aven si te del pes avri vi o regulamento sar kerel pes kodo.
E paketurja vaš e bazutne servisurja ando angluno medikalo džutimos sas buhljarde thaj kadala šaj te den pes na toke ando kabineto le familiake doktorosko, ama vi ando kher le nasfalesko vaj ando than kaj mangel pes.
E familiake doktorja šaj te rekomandisaren le nasfalenge te len draba ande verver forme, vi khere, ama vi avrjal o programo le butjako.
I Adriana Pistol, i statoski sekretarka ando Ministero le Sastimasko: „Kadja del pes akceso le nasfalenge pe, minimalo 35 časurja po kurko, minimalo 5 divesa, sigurno kado nevo programo butjako si te kerel pes ando hatjaripe le Kherenca vaš i Sastimaski Siguranca”.
Pal sar džan e kontractualo relacie, sas lilo samate o šajpe te barjarel pes o programo le butjako maksimalo 17,5 časurjenca po kurko vaš sako doktoro vaš o parakliniko specialiteto, pal sar phenel o RRA.
O Guverno maj aprobisardja parastine vi e finance vaš 13 nacionalo programurja andar o budžeto le Sastimaske Ministerosko thaj vaš aver 15 kurativo sastimaske programurja save si dine vast vaš o Uniko Nacionalo Fondo vaš Sastimaski Siguranca.